|
قرن الألفية ! سيد الموجى يا قرن تالت ألفيَّة هدّى شويّة مالك رقبتك ملويَّة وريشك منفوش ؟! **** حلمك علينا يا قرنونة يا صغنونة صحيح قرايبك خمُّونا لكن ماداموش **** وهكذا الأيام زيطة تاخدها الشيطة واسألها قول للبرنيطة فين الطربوش ؟! **** قريبك القرن العشرين ضحاياه ملايين ومعظم اللى عاشوه مساكين صيروا ومانالوش **** كان قرن أفكاره غبية خبيث النية رافع شعار للحرية زايف مغشوش **** ساد فيه تلوث غير مسبوق وضياع لحقوق وتدنى فى الأخلاق والذوق ماتخيلتوش **** وهلبوا كنوز خيراته مليونيراته والفقرا عاشوا على فتاته بل قول ماعاشوش **** والمعرفة بانفجاراتها وابتكاراتها شرورها غلبت خيراتها فى زمن مرووش ! **** ومنظماته الدولية ( الحيادية) كانت فى قرارتها بقية لأحكام ( قراقوش ) ! **** وأما عن حال أمتنا ولاد عمومتنا باعوا بقية كرامتنا لأحط وحوش ! **** يا قرن ( انترنتاوى ) على ايه ناوى ؟ كان اللى قبلك مأسالوى ماتقلدهوش **** حاول تجبَّر مكاسيره وتكون غيره لو كان كِشِر وقليل خيره ابقى انت بشوش ! **** والهيمنة الأمريكانية ع البشرية بيِّن صورتها الحقيقية بلا أى رتوش **** وقول لغنم العالم عيب يخدعهم ديب انسوا الخلاف واكشفوا ألاعيب (كليجونفوربوش) ! **** ولو الخلاف دبّ ما بينكم حكِّموا دينكم وان قالوا طب نييجى نعينكم قولوا لأ ماتجوش ! **** قولوا يا رب يوفقكم ويزيح داءكم له بس مفاتيح أرزاقكم وخلافه مالوش **** وبطَّلوا ركوع إلا له جَّل جلاله وخالفوا ناس قبلكو قالوا بس ماعملوش ! |
